HƏMAS Siyasi Bürosunun rəhbəri İsmayıl Haniyənin Tehranda öldürülməsindən sonra İranın İsrailə qarşı cavab tədbirlərinin gözlənildiyi bir məqamda, Suriyada ABŞ qüvvələri ilə İranın dəstəklədiyi qruplar arasında gərginlik hökm sürür.
Bu barədə hakimiyyet.az "Haber Global"a istinadən bildirir.
Suriyada PKK/YPG terror təşkilatının İŞİD-ə qarşı mübarizə adı altında işğal etdiyi bölgələrdə ABŞ-nin hərbi bazaları yerləşir.
Bəşər Əsəd rejimini dəstəkləyən, İranın himayəsindəki qrupların isə əsasən Deyrizor əyalətində pərakəndə şəkildə yeraltı tikililəri var.
Yerli mənbələrdən alınan məlumata görə, artan gərginlikdən sonra ABŞ qüvvələri Haseke vilayətindəki bazalarından İranın dəstəklədiyi qrupların sıx şəkildə mövcud olduğu və mümkün təmas xəttində olan Deyrizordakı bazalarına son günlərdə çox sayda PKK/YPG terrorçusunu və silah-sursatını köçürüb.
ABŞ qüvvələri Hasekedəki Robarya, Rümeylan və Şəddadi bazaları, Fərat çayının şərqindəki Ömər neft sahəsi, Koniko və Tenek bazalarında ola biləcək hücuma qarşı tədbirlər görüb və təxminən 700 PKK/YPG terrorçusu oraya yerləşdirilib.
Digər tərəfdən ABŞ ordusu da bu bazalara sursatla dolu yük maşınları və "Humvee" tipli döyüş maşınlarından ibarət 70 maşınlıq hərbi konvoy göndərib.
Qeyd edək ki, ABŞ son illərdə Suriyadakı bazalarını "Sentinel" radar sistemi, ortamənzilli və idarə olunan, yüksəkperformanslı "HIMARS" hava hücumundan müdafiə sistemi, ortamənzilli haubitsa artilleriyası və yaxınmənzilli "Avenger" hava hücumundan müdafiə sistemləri ilə gücləndirib.
Hazırda ABŞ qüvvələri Fərat çayının qərb xəttində yerləşdirilmiş İranın dəstəklədiyi qrupları havadan müşahidə cihazları ilə izləyir.
İranın dəstəklədiyi qruplaşmaların Suriyanın Dəməşq əyalətinin cənubunda, Deyrizor əyalətinin mərkəzində, Meyadin, Muhasan və Bukemal rayonlarında və Suriya-İraq sərhəd xəttində sıx şəkildə mövcudluğu müşahidə olunur.
Burada İranın dəstəklədiyi qruplar ABŞ və İsrailin hücumlarından qorunmaq üçün tunellərdən və yeraltı sığınacaqlardan istifadə edir.
İsrail və ABŞ-nin əvvəlki hücumları ilə hərəkətlilik qabiliyyəti azalan İranın dəstəklədiyi qruplar Əsəd rejimi əsgərlərinin formasını geyinərək özlərini kamuflyaj etməyə çalışırlar.
