Böyük Vətən müharibəsinin İmişli rayonunda yaşayan sonuncu iştirakçısı vəfat edib.

"Report"un Muğan bürosunun məlumatına görə, veteran Nəbi Nuriyev 102 yaşında dünyasını dəyişib.

N.Nuriyev yaşadığı Qaralar kəndində dəfn olunub.

Qeyd edək ki, o, 1942-ci il fevral ayının 28-də cəbhəyə yollanıb. 130-cu atıcı alayın tərkibində döyüş yolu keçib. Döyüşlərdə göstərdiyi şücaətə görə ona çavuş rütbəsi verilərək, bölmə komandiri vəzifəsi tapşırılıb. Sovet-yapon müharibəsində də o, ağır döyüşlərdən keçib. Yaponların cəngavər generalı sayılan Kvantın döyüşən ordusu ilə üz-üzə gəlib. Yaponiyanın Vadlin şəhərinədək döyüş yolunu davam etdirən Nəbi Nuriyev həmin ordunun təslim olunması əməliyyatında da xüsusi fəallığı ilə seçilib.

O, Heydər Əliyevin Böyük Vətən müharibəsində faşizm üzərində çalınan qələbənin 55 illiyi ilə bağlı 2000-ci ildə imzaladığı Sərəncamla "1941-1945-ci illər müharibəsi veteranı" döş nişanı ilə təltif olunub.