Bu ilin fevralında Azərbaycan Qida Təhlükəsizliyi Agentliyi (AQTA) sədri Qoşqar Təhməzli bəyan edir ki, özəl qida laboratoriyaları açılmalıdır.

Lakin çox çəkmir ki, onun bu təəssübkeşliyi ikrah hissi doğurmağa, ironiya ilə qarşılanmağa başlayır.

Reportyor.info xəbər verir ki, buna səbəb Q.Təhməzlinin fəaliyyətdə olan özəl qida laboratoriyalarına qarşı “səlib yürüşü” təşkil etməsidir.

Respublikada müstəqil olan qida laboratoriyaları AQTA sədrinin hədəfinə tuş gəlib və Q.Təhməzli bu məntəqələrin bağlanması üçün əlindəki bütün resurslarını səfər edib.

AQTA sədrinin məqsədinə çatmaqda niyyəti bu sektoru bir əldə cəmləmək, monopoliya yaratmaqdır.

Laboratoriyaların işinə xitam verilməsi qida müəssisələrini Q.Təhməzlinin tabeliyindəki laboratoriyalardan asılı vəziyyətə gətirməyə hesablanıb.

AQTA şefinin laboratoriyalarında qida təhlükəsizliyinin yoxlanılması olduqca bahadır.

Məsələn, bir pendir növünün test edilməsi azı 300 manatdır. Özəl qida laboratoriyalarında isə qiymətlər daha münasibdir.

Əldə etdiyimiz xəbərlərə görə, artıq bir neçə özəl yoxlama məntəqəsinin sıxışdırılıb qapadılmasına müvəffəq olunub. AQTA sədri gömrük inhisarçılarından geri qalmayaraq monopolist siyasət yürütməkdədir.

Təsadüfi deyil ki, Qida Təhlükəsizliyi Agentliyi “Laborator sərf materiallarının satın alınması” üzrə elan etdiyi tenderdə Q.Təhməzlinin şirkətini qalib elan etmişdi. Qalib şirkət “Medeks” MMC idi.

Bu mənada qida laboratoriyaları “qan ağlamağa” başlayıb. Bazarda rəqabətsizlik yaradan, qida şirkətlərini ona aid laboratoriyalarda yoxlamadan keçməyə məcbur edən AQTA şefinin öz tarifləri var.

İstehsalat müəssisələri isə onun müəyyən etdiyi qiymətlərlə hesablaşmır, baha məbləğə tetdən keçməyə razılıq vermirlər.

Prezidentin ona göstərdiyi etimaddan sui-istifadə etməkdə olan Q.Təhməzli deyəsən, daha da varlanmaq ehtirası ilə alışır.

Nəticədə qida sektorunda şəffaflıq yaratmalı olan məmur narazılıq, inhisar yaratmaqdadır. Bu gedişlə sahibkarları dövlətin üstünə qaldıracaq Q.Təhməzlinin fəaliyyəti sabotaja bənzəyir.

Bu sahəni də biznesə çevirən, laboratoriyaları bağladan monopolist məmurun işindən narazılıq həmin məntəqələrin rəhbərləri tərəfindən prezidentə çatdırılacaq.

Yeri gəlmişkən, bir müddət əvvəl AQTAhəkimlərinin həbsi qurumdakı vəziyyətə dair buna bir nümunədir. Ondan əvvəl isə agentlik qida sektorunda əsas pay sahibi olan holdinqləri şantaj etməkdə ittiham olunurdu.

Mediada gedən xəbərlərə görə, agentlik guya ölkəyə virus olan “Tutku”, “Ozmo”, “Pop kek” və s. şirniyyatların gətirildiyi xəbərini yaymışdı.

Sonra həmin şirkətdən külli miqdarda rüşvət istədiyi iddiaları mətbuatda yayılmışdı. Bu dosye halına gələn xəbərlər Qoşqar Təhməzliyə yaxşı perspektiv vəd etmir.

Qida Təhlükəsizliyi Agentliyi yaxşı niyyətlər üçün yaradılsa da onun sədri Qoşqar Təhməzlinin yaxın ətrafının dövlət agentliyi ilə bağlı ümidləri,fikirləri,ən əsas da niyyətləri tam başqadır.

Jurnalist Eynulla Fətullayev də Q.Təhməzlini ağır şəkildə tənqid etmişdi: “Bu gün Azərbaycanda korrupsiyaya ən çox bulaşmış dövlət orqanı – Qida Təhlükəsizliyi Agentliyidir.

Şəhərin canına düşüb bütün kafe və restoranlardan rüşvət yığırlar. Halbuki, beynəlxalq təşkilatların rəyinə görə, Azərbaycanda qida təhlükəsizliyi problemi katastrofik durumdadır”.

Yada salaq ki, cənab Təhməzlinin Slovakiyadakı Saffran S.R.O. şirkəti hotel və mehmanxanaları tekstil və hamam aksesuarları ilə təmin edir (şirkətin saytı: http://saffran.sk).

Agentlik rəhbərinin Bratislavada şirkətin məhsullarını təqdim edən satış mərkəzi də fəaliyyət göstərir. Şirkət 5000 avro nizamnamə kapitalı ilə Bakı şəhəri Orucəliyev küçəsi 9/12, mənzil 40-da qeydiyyatda olan Təhməzlinin öz adına rəsmiləşdirilib.

25 dekabr 2017-ci ildə cənab Təhməzli Qida Təhlükəsizliyi Agentliyinin sədri təyin edildikdən sonra Slovakiyadakı biznesini yaxın adamı olan Cavidan İmanovun adına keçirmək qərarına gəlir.

2018-ci il iyulun 3-də Saffran S.R.O. Belarus vətəndaşı, Minsk sakini Svitlana Palamarchukun (20%) və Cavidan İmanovun (80%) adına keçirilir.

Təhməzlinin şirkəti Avropa şirkəti adı ilə Ukrayna bazarına da daxil olub. Nizamnamə kapitalı 21 milyon Ukrayna qrivnisi olmaqla bu ölkədə də qeydiyyata alınan şirkətin Ukraynadakı ofisi Solomensky, Vadim Hetman küçəsi 27 ünvanında yerləşir və Palamarchuk Svetlana Valentinovna tərəfindən idarə olunur.

Təhməzlinin Gürcüstanda Universal Medikal Group şirkəti fəaliyyət göstərır. Şirkət 2011-ci il dekabrın 22-də Tiflisin regional Bako Saburtalo vergi müfəttişliyində B11184596 saylı şəhadətnamə ilə qeydiyyata alınıb.

Şirkətin 50 faizlik hissəsi agentlik rəhbərinə, 50 faizlik hissəsi isə Türkiyə vətəndaşı Oqtay Öztürkə aiddir. Cənab Təhməzlinin Türkiyədə də biznesi var.

Agentlik rəhbəri “Tosgo group medikal inşaat ve turizm sanayi ticaret limited şirketi”ni hələ 2014-cü il mayın 5-də İstanbulda qeydiyyatdan keçirib.

Şirkət tibbi avadanlıqların, kosmetik vasitələrin və tekstil məhsullarının istehsalı və satışı ilə məşğuldur.