"Əlinizi bizdən çəkin!" -- deyən qiymətli obyekt və ofis sahibləri, mülkiyyət hüquqları tanına qədər etiraz tədbirlərini davam etdirəcəklərini deyirlər

          Uzun müddətdir ki, paytaxt Bakının ən elitar ərazisində -- Nərimanov rayonu, Səməd Vurğun küçəsi, 120 ünvanında yerləşən "Yasmin" biznes mərkəzindən, külli miqdarda pullarını ödəməklə, özlərinə obyekt və ofislər alan 20 nəfərdən çox iş adamının olmazın haqsızlıqlarla üz-üzə qalmaları barədə, ölkə ictimaiyyəti də məlumatlıdır. Onu da bildiririk ki, haqları tapdanan bu sahibkarlar “Mars -- M” MMC-nin və “XalqBank”ın iştirakçısı olduğu tikinti fırıldağının qurbanlarıdırlar. Bu fırıldaq işlərində, bir neçə aidiyyatı dövlət qurumu da, hansısa formada rol oynayıb. Müəyyən iddialara görə, fırıldaq əməllərini ört-basdır etmək üçün, bu günə kimi, həm hüquq-mühafizə orqanları, həm də məhkəmələr hansısa maraqlar çərçivəsində 5 milyon manatdan çox ziyana düşmüş həmin obyekt və ofis sahiblərini öz investisiyalarından məhrum etməyə çalışırlar.

 Xeyli müddətdir ki, burada baş verən qalmaqallı olaylarla bağlı, ölkə mətbuatı ilə bərabər, araz.az saytı da onlarla yazı dərc edib. Onu da qeyd edək ki, bu iş adamları, son ümid yeri olaraq, bu ciddi məsələ ilə bağlı, ölkə başçısı möhtərəm İlham Əliyev cənablarına və Birinci vitse-prezident Mehriban xanım Əliyevaya da müraciətlər ünvanlayıb və bu etiraz yazılarında, üzləşdikləri bu cinayət əməlinin yalnız onlara qarşı deyil, eyni zamanda dövlətimizə, xalqımıza, cənab Prezidentin yürütdüyü daxili siyasətə qarşı olduğunu da xüsusi vurğulayırlar. Onlar, ölkə rəhbərinə və Birinci vitse-prezidentə ünvanladıqları həmin müraciətlərində: "Sizdən xahiş edirik ki, bu məsələni şəxsi nəzarətinizə götürüb, haqq-ədalətin bərpa olunmasında bizə kömək əlinizi uzadasınız! Çünki "XalqBank" "Yasmin" biznes mərkəzini, məhkəmələr gedə-gedə hərraca çıxarmaqla, biz sahibkarlara hərtərəfli ciddi zərbələr vurur!” -- deyə, öz kəskin etirazlarını bu sözlərlə ifadə edirlər.

    Unutmaq olmaz ki, cənab Prezident öz çıxışlarında dəfələrlə sahibkarlığın inkişafına mane olmaq istəyənləri, Azərbaycana xəyanət edən qatı düşmən hesab etdiyini bildirib. Yəni, ölkə rəhbəri dönə-dönə vurğulayıb ki, ölkənin uğuru onun biznesinin inkişafından daha çox asılı olduğu üçün, bu məqsədlə ortaya qoyulan dövlət siyasətinə, prezidentin siyasi iradəsinə hörmət və ehtiram göstərilməli, dövlət qurumları bu inkişafa maneçilik törətməməli, əskinə, daha yaxından kömək edib, şərait və imkan yaratmalıdırlar. Cənab Prezidentin bu yöndə etdiyi çıxışların varlığına baxmayaraq, ölkə biznesinin inkişafına əngəl olan məmurlar, eləcə də "XalqBank" ASC-də və "Mars -- M" MMC-də məsul vəzifə tutanlar, Yasmin» biznes mərkəzindəki 20 nəfərdən çox obyekt və ofis sahibinin başlarına olmazın oyunlar gətiriblər. Baxmayaraq ki, Bakı Apellyasiya Məhkəməsinin 5 aprel 2017-ci il tarixli və Ali Məhkəmənin 18 oktyabr 2017-ci il tarixli ədalətli qərarları ilə, zərərçəkən bu sahibkarların mülkiyyət hüquqları müdafiə də olunub. Di gəl ki, sahibkarların hüquqlarını müdafiə edən həmin qərarları isə, Konstitusiya Məhkəməsi özünün 18 iyul 2018-ci il tarixli Qərarı ilə ləğv edib və Ali Məhkəmənin Plenuma göndərməsini məqsədəuyğun hesab edib. Bu isə, Konstitusiya Məhkəməsində qol qoyulan ciddi qanun pozuntusu kimi, kəskin etirazlarla qarşılanıb. Daha sonra, Plenum işə Apellyasiya Məhkəməsində ətraflı baxılması üçün, Qərar qəbul edib. Nə olsun!.. "Çevir tatı, vur tatı!" həmişə öz sözünü deyib.  Ümumiyyətlə, obyekt sahibləri bu yöndən baş verənlərin hər birini əsl cinayət hadisəsi kimi qiymətləndirirlər.

Qeyd edək ki, iddiaçı obyekt və ofis sahibləri Əliyev Elçin Vahid oğlu, Məhərrəmov İlqar Sübhi oğlu, Məmmədova Ruhiyyət Əksəriyyət qızı, Quliyev Sahib Həmid oğlu, Hüseynov Anar Allahverən oğlu, Zamanov Ədalət Rəhman oğlu, Kazımov Zülfüqar Musa oğlu, Bağırova Natəvan Şəmistan qızı, Mahmudov Akif  Bilal oğlu, Mahmudov Azər Akif oğlu və Əfəndiyeva (Məmmədova) Tahirəxanım Adil qızı... cavabdehlər “XalqBank” və “Mars -- M” arasında bağlanmış 8 iyul 2015-ci il tarixli ipoteka müqaviləsinin etibarsız hesab edilməsinə dair, İddia Ərizəsi ilə, bir daha məhkəməyə müraciət etsələr də, Bakı şəhər, Nərimanov Rayon Məhkəməsinin 16 sentyabr 2020-ci il tarixli 2(005)-512/2020 saylı Qətnaməsi ilə, iddia tələbi təmin olunmayıb. İddiaçılar bu Qətnamədən apellyasiya şikayəti versələr də, Bakı Apelyasiya Məhkəməsinin Mülki Kollegiyasının 24 noyabr 2020-ci il tarixli 2(103)-8277/2020 saylı Qətnaməsi ilə apellyasiya şikayətini təmin etməyib. Məcburiyyətdən, iddiaçılar Azərbaycan Respublikasının Ali Məhkəməsinin Mülki Kollegiyasına Kassasiya Şikayətlərini təqdim ediblər və Bakı Apelyasiya Məhkəməsinin Mülki Kollegiyasının 24 noyabr 2020-ci tarixli 2(103)-8277/2020 saylı Qətnaməsinin ləğv olunmasını istəyiblər.

 İddia tələbinin təmin olunması barədə Qərar qəbul olunmasını xahiş edənlər, bu dəfə də, haqsızlıqla üzləşiblər. Bu günlərdə, Ali Məhkəmənin Mülki Kollegiyası onların Kassasiya Şikayətindəki tələbələrini təmin etməyib və Bakı Apelyasiya Məhkəməsinin Mülki Kollegiyasının Qərarını qüvvədə saxlayıb. Bütün bunlar bir daha onu sübut edir ki, “Xalq Bank”ın başında duranların yuxarılara bağlılıqları danılmaz həqiqətdir. Onların məhkəmə hakimlərinə hansısa yollarla təsir göstərərək, istəklərinə nail ola bilmələri elə də çətin olmur.

Sonda onu da bildirək ki, “Mars -- M” MMC-nin və “XalqBank”ın fırıldağına məruz qalan və mülkiyyət hüquqları pozulan bu sahibkarlar, ölkədə ədalətli açıq məhkəmə prosesinin təmin edilməməsi ucbatından, məcburiyyətdən, pozulmuş hüquqlarının bərpa olunması məqsədilə, son ümid yeri olaraq,  Avropa İnsan Hüquqları Məhkəməsinə üz tutmağı qərara alıblar.
Mövzu maraqlı olduğu üçün, diqqətdə saxlayacağıq.

Malik MİRZƏ,
Səməndər QURBANOV,
araz.az xəbər portalının xüsusi müxbirləri