Mayın 10-11-də Günəşdə baş verən güclü partlayışlar nəticəsində yaranan güclü geomaqnit qasırğası Yerin dəniz dərinliklərinə çatıb.

Bu barədə Viktoriya Universitetində “Ocean Networks Canada” (ONC) layihəsinin kanadalı tədqiqatçıları məlumat veriblər.

Kanadanın qərb və şərq sahillərində yerləşən ONC sualtı rəsədxanaları 2,7 km dərinlikdə planetin maqnit sahəsinin müvəqqəti təsirini qeydə alıb.

Ən əhəmiyyətli maqnit təsiri kompas istiqamətini +30 ilə -30 dərəcə arasında dəyişib və Vankuver adasının sahillərində ONC NEPTUNE kabel rəsədxanasının bir hissəsi olan “Folger Passage” sualtı məkanında qeydə alınıb.

Alimlərin fikrincə, yaxın bir neçə il indiki Günəş tsiklinin pik dövrü olacaq, ona görə də bu cür hadisələr əvvəlki illərlə müqayisədə çox tez-tez baş verəcək.

Mənbə: Gazeta.ru