Anar Həsənov yazır...

Bu mövsümə də uğurlu start verən Qurban Qurbanovun komandası, UEFA Çempionlar Liqasının təsnifat mərhələlərində keçirdiyi dörd oyunda 15 qol vurub. "Köhlən atlar" evdə Bolqarıstan çempionuna məğlub olsalar da (1:2), Razqradda əsl şou göstəriblər. "Qarabağ" ilk və son dəfə 2017/18 mövsümündə Çempionlar Liqasının qrup mərhələsinə yüksəlib və həmin mövsümdə "Çelsi", "Atletiko Madrid" və "Roma" ilə eyni qrupda sonuncu yeri tutub.

Son Avrokubok görüşlərində isə "göy-ağlar" Çempionlar Liqasının təsnifat mərhələsində çıxış etsələr də, ikinci mərhələdə Polşa "Rakuv"una qarşı mübarizədə mübarizədən kənarlaşdırılıb (2:3, 1:1) və yoluna Avropa Liqasında davam ediblər. Orada Qurban Qurbanovun yetirmələri İsveçin HİK komandasını (2:1, 2:1) və Sloveniyanın "Olimpiya"sını (2:0, 1:1) məğlub edərək "Bayer", "Molde" və "Haeken"lə eyni qrupda yer alıb. "Köhlən atlar" norveçliləri və isveçliləri məğlub edərək, yalnız "Bayer Leverkuzen"dən geri qalıb.

"Qarabağ" pley-offda sensasiyalı şəkildə "Braqa"ya qalib gəlib (4:2, 2:3) və 1/8 finalda yenidən "Bayer"lə qarşılaşıb. Azərbaycan çempionu Xabi Alonsonun komandasının məğlubiyyətsizlik seriyasını qırmağa çox yaxın olub. Amma iki görüşün yekun nəticəsinə əsasən, mövsümün məğlubedilməzi növbəti mərhələyə yüksələn tərəf olub.

Keçən mövsüm "mavilər" ardıcıl yeddinci dəfə Xorvatiya çempionu olaraq, titulların sayına görə ölkə rekorduna imza atıblar.

"Dinamo Zaqreb" Çempionlar Liqasına birbaşa pley-off mərhələsindən başlayacaq. Onlar səkkiz dəfə əsas Avropa turnirinin qrup mərhələsində iştirak ediblər. Sonuncu dəfə bu hal 2022/23 mövsümündə baş verib. "Dinamo" "Çelsi", "Milan" və "Zalsburq"la eyni qrupda sonuncu yeri tutub. Zaqreb klubu Londonda qələbə (1:0) ilə başlasa da, sonrakı beş turda cəmi bir xal toplayıb.

Keçən mövsüm Sergey Yakiroviçin komandası Konfrans Liqasının qrup mərhələsində çıxış edib. Pley-offda "Betis"ə qalib gələn "Dinamo Zaqreb" (1:0, 1:1), 1/8 finalda PAOK-la qarşıdurmada (2:0, 1:5) mübarizədən kənarlaşdırılıb.

"Dinamo Zaqreb" "Qarabağ"la görüşə iki itki ilə çıxacaq. Sadeq Moharrami və Mauro Perkoviç zədə səbəbindən komandalarına kömək edə bilməyəcəklər.

"Dinamo Zaqreb" - "Qarabağ": Komandalar tarixdə ilk dəfə bir-biri ilə qarşılaşacaqlar. Onlar indiyədək nə rəsmi, nə də yoldaşlıq görüşündə üz-üzə gəliblər.

Qeyd edək ki, "Dinamo Zaqreb" - "Qarabağ" görüşü avqustun 20-də Xorvatiyada "Maksimir" stadionunda keçiriləcək. Qarşılaşma Bakı vaxtı ilə saat 23:00-da başlayacaq.