Braziliyanın "Fluminense" futbol klubu və müdafiəçi Marselo müqavilənin ləğvi barədə qarşılıqlı razılığa gəliblər.

hakimiyyet.az TASS-a istinadən xəbər verir ki, bu barədə komandanın mətbuat xidməti məlumat yayıb.

Noyabrın 2-də "Fluminense" Braziliya çempionatında "Qremio" ilə evdə 2:2 hesablı heç-heçə edib. İkinci hissədə baş məşqçi Mano Menezes Marselonu əvəzləmək istəyib, lakin məşqçi ilə futbolçu arasında mübahisə yaranıb. Daha sonra məşqçi əvəzetməni ləğv edib.

Qeyd edək ki, Marselo 36 yaşındadır. O, "Fluminense"nin yetirməsidir və 2023-cü ilin fevralında komandaya qoşulub. Braziliyalı müdafiəçi karyerasının böyük bir hissəsini "Real Madrid" klubunda keçirib. O, bu müddətdə altı dəfə İspaniya çempionatının, beş dəfə UEFA Çempionlar Liqasının və İspaniya Superkubokunun, dörd dəfə Klublararası Dünya Kubokunun, üç dəfə UEFA Super Kubokunun qalibi olub. 2023-cü ildə Marselo "Fluminense" ilə Libertadores Kubokunu qazanıb.

Hazırda "Fluminense" Braziliya çempionatının turnir cədvəlində 12-ci yerdədir. Komanda 32 oyundan sonra 37 xala sahibdir.